"ரஷ்யாவுக்கு எதிரான போரில் உக்ரைன் வீரர்கள் அதிக அளவில் உயிரிழப்பர்" -அமெரிக்க ராணுவ தளபதி எச்சரிக்கை !

ரஷ்யா - உக்ரைன் இடையேயான போர் தற்போது ஒரு வருடத்தை தாண்டியும் தற்போது உக்கிரமான நடந்து வருகிறது. வான்வழி, கடல்வழி மற்றும் தரைவழி என மும்முனை தாக்குதலை நடத்துவதால் பெரும் உயிரிழப்புகள் ஏற்பட்டுள்ளன. உக்ரைன் நாட்டின் ஏராளமான இராணுவ இலக்குகளை ரஷ்யப் படைகள் தாக்கி அழித்துள்ளன.

அதேபோல் உக்ரைன் தங்களைத் தற்காத்துக்கொள்ள, ரஷ்யப் படைகளுக்குப் பதிலடி கொடுத்து வருகிறது. எனினும் உக்ரைனின் மேற்கு பகுதியில் பெரும்பாலான பகுதிகள் ரஷ்ய கட்டுப்பாட்டின் கீழ் வந்துள்ளன. போர் தொடங்கியதிலிருந்து அமெரிக்கா உள்ளிட்ட மேற்கத்திய நாடுகள் உக்ரைனுக்கு ஆதரவாக ஆயுதங்களை வழங்கி வருகின்றன.

இதுதவிர உக்ரைனுக்கு ஆதரவாக ரஷ்யா மீது பொருளாதாரத் தடையும் விதித்துள்ளனர். இத்தனையும் மீறி ரஷ்யா தொடர்ந்து போரைத் தொடர்ந்து வருகிறது. அதேபோல உக்ரைனும் பின்வாங்காமல் தொடர்ந்து ரஷ்யாவை எதிர்த்துப் போரிட்டு வருகிறது. , உக்ரைனுக்கு ஆதரவாக ஐரோப்பிய நாடுகள் வலுவான அதிநவீன லெப்பா்ட்-2 பீரங்கிகளை உக்ரைனுக்கு வழங்கிய நிலையில், இது மோதலை அடுத்த கட்டத்துக்கு எடுத்துசென்றது.

இதுதவிர அமெரிக்கா, உள்ளிட்ட நேட்டோவின் அதிநவீன ஆயுதங்களும் உக்ரைனுக்கு கிடைத்த நிலையில், இதனைத் கொண்டு இனி தற்காப்பு உத்தியை கைவிட்டு ரஷ்யா மீது தாக்குதல் நடத்தப்போவதாக உக்ரைன் அறிவித்த நிலையில், கடந்த வாரம் அந்த தாக்குதல் நடைபெற்றது.இந்த தாக்குதலின்போது அதிநவீன லெப்பா்ட்-2 பீரங்கிகள் அதிக பங்குவகிக்கும் என்று எதிர்பார்க்கப்பட்டது. மேலும் அந்த பீரங்கிகள் எதிர்க்கவே முடியாதது என விளம்பரம் செய்யப்பட்ட நிலையில், இந்த தாக்குதலில் ரஷ்யா தோல்வியைத் தழுவும் என மேற்கத்திய ஊடகங்கள் கூறின.

ஆனால், இந்த தாக்குதலில் 8 லெப்பா்ட்-2 பீரங்கிகளை ரஷ்யா தாக்கி அளித்ததாக அதிகார்பூர்வமாக அறிவிப்பு வெளியாகியுள்ளது. மேலும் உக்ரைனின் தாக்குதல் தொடங்கிய சில நேரத்திலேயே அது முடிவுக்கு வந்துள்ளது, இதில் ஏராளமான உக்ரைன் வீரர்களும், ஆயுதங்களும் அழிக்கப்பட்டதாகவும் ரஷ்யா அறிவித்துள்ளது. மேலும், அதற்காக வீடியோவையும் வெளியிட்டுள்ளது. உக்ரைனின் இந்த தோல்வி மேற்கத்திய நாடுகளுக்கு பெரும் பின்னடைவாக பார்க்கப்படுகிறது.

இந்த நிலையில், இந்த எதிர் தாக்குதல் உக்ரைன் வீரர்கள் அதிக அளவில் உயிரிழப்பர் என அமெரிக்க ராணுவ தலைமைத் தளபதி மாா்க் மில்லி தெரிவித்துள்ளாா். இது குறித்து பேசிய அவர், " இழந்த பகுதிகளை மீட்கும் உக்ரைனின் நடவடிக்கையால் உக்ரைன் தரப்பில் உயிரிழப்புகள் மிக அதிகமாக இருக்கும். அது குறித்து நாம் குறைத்து மதிப்பிடக்கூடாது. சவால்கள் நிறைந்த, கண்ணிவெடிகள் புதைக்கப்பட்டுள்ள நிலப் பகுதியை உக்ரைன் ராணுவம் மிகவும் கவனமாகக் நாளொன்றுக்கு 100 மீட்டா், 1,000 மீட்டா் என்ற கணக்கில் கடந்து முன்னேறி வருகிறது"என்று கூறியுள்ளார்.

ஆனால் ரஷ்யா தரப்பில் உக்ரைனின் இந்த எதிர்த்தாக்குதல் முயற்சியை தடுத்து நிறுத்திவிட்டோம் என்றும், உக்ரைன் ஆரம்பத்தில் கைப்பற்றிய ரஷ்யா ஆக்கிரமைப்பு பகுதிகளையும் மீட்டுவிட்டோம் என்றும் கூறியுள்ளார். இது தவிர பல்வேறு போர் நிபுணர்களும் ரஷ்யாவின் இந்த கூற்றை ஒப்புக்கொண்டுள்ளனர் என்பது குறிப்பிடத்தக்கது.