Budget2022 : ’ஒரே நாடு’ கொள்கையை விடாத பாஜக; சாமானியனுக்கு ஜீரோ.. கார்ப்பரேட்டுக்கு ஹீரோவா?

2022-2023ம் ஆண்டுக்கான பட்ஜெட் உரையை நாடாளுமன்றத்தில் காலை 11 மணியளவில் வாசிக்க தொடங்கிய ஒன்றிய நிதியமைச்சர் நிர்மலா சீதாராமன் 12.30 மணியளவில் உரையை முடித்தார்.

நிர்மலா சீதாராமனின் நடப்பு ஆண்டுக்கான பட்ஜெட் உரையின் விவரம் பின்வருமாறு:-

• நடப்பு நிதியாண்டில் இந்தியாவின் பொருளாதார வளர்ச்சி 9.2% ஆக இருக்கும் என கணிக்கப்பட்டுள்ளது.

• 5 ஆண்டுகளில் 60 லட்சம் பேருக்கு வேலைவாய்ப்பு உருவாக்கப்படும்.

• ஏர் இந்தியா நிறுவனம் முழுமையாக தனியார் மயமாக்கப்பட்டுள்ளது.

• அடுத்த 3 ஆண்டுகளில் 400 புதிய வந்தே பாரத் ரயில்கள் இயக்கப்படும்.

• நாடு முழுவதும் இயற்கை விவசாயத்தை ஊக்குவிக்க பல்வேறு நடவடிக்கைகள் எடுக்கப்படும்.

• ரயில்வே உதவியுடன் வேளாண் பொருட்கள் ஏற்றுமதியை அதிகரிக்க நடவடிக்கை எடுக்கப்படும்.

• கிராமப்புற மற்றும் மலைவாழ் மாணவர்களுக்கு PM E-Vidhya திட்டம் வழியாக 200 டிவி சேனல்கள் மூலம் மாநில மொழிகளிலேயே பாடங்கள் நடத்தப்படும்.

• டிஜிட்டல் ரூபாய் அறிமுகப்படுத்தப்படும். ஒன்றிய அரசு சார்பில் க்ரிப்டோகரன்சி அறிமுகப்படுத்தப்படும்; டிஜிட்டல் பொருளாதாரத்தில் இது புதிய எழுச்சியாக இருக்கும்.

• 1.5 லட்சம் அஞ்சல் நிலையங்கள் மின்னணு முறையில் இணைக்கப்பட்டு, பணப் பரிமாற்றத்திற்கு உதவும் வகையில் மேம்படுத்தப்படும்.

• மின்சார வாகனங்களுக்காக ஊரகப்பகுதிகளில் சார்ஜிங் நிலையங்கள் அமைக்கப்படும். இந்தியா அம்ருத காலத்தில் நுழைந்துள்ளது.

• நாடு முழுவதும் விரைவில் 5ஜி அலைக்கற்றை ஏலம் விடப்படும்.

• டிஜிட்டல் பரிவர்த்தனை நாட்டின் எல்லா மூலைகளுக்கும் செல்ல வேண்டும்.

• 1.5 லட்ச தபால் நிலையங்களில் வங்கி சேவைகள் வழங்கப்பட்டுள்ளன; தபால் நிலைய சேமிப்பு கணக்கிலிருந்து வங்கி கணக்குகளுக்கு பணம் அனுப்பும் வசதி விவசாயிகளுக்கு பெருமளவில் உதவியுள்ளது.

• நகர திட்டமிடலுக்கு உயர்மட்டக்குழு அமைக்கப்படும்.

• ராணுவ ஆராய்ச்சி மற்றும் மேம்பாட்டு பிரிவில் ஸ்டார்ட் அப் நிறுவனங்கள் தொடங்க அனுமதி.

• 2030ம் ஆண்டுக்குள் 280 ஜிகா வாட் மின்சாரம் சூரிய ஒளி மூலம் தயாரிக்க இலக்கு நிர்ணயம்.

• சூரிய ஒளி மின்சார தயாரிப்பு பொருள்களை உருவாக்குவதற்காக 19,500 கோடி ரூபாய் ஒதுக்கீடு.

• இளைஞர்களுக்கு அதிக வேலைவாய்ப்பு அளிக்கும் வகையில் ஒலி, ஒளி, வரைகலை சார்ந்த பணிகள் ஊக்குவிக்கப்படும்.

• பணம் செலுத்துவதில் ஏற்படும் தாமதத்தைக் குறைக்க அனைத்து அமைச்சகங்களும் பயன்படுத்தும் வகையில் ஆன்லைன் பணம் செலுத்தும் திட்டம் தொடங்கப்படும்.

• பாதுகாப்புத் துறைக்கான இறக்குமதி குறைக்கப்படும்.

• One Nation One Registration நிலப்பதிவிற்காக ஒரே நாடு ஒரே பதிவுமுறையின் மூலம் நாட்டின் எந்த பகுதியில் இருந்தும் பத்திரப்பதிவுகளை மேற்கொள்ளும் முறையை கொண்டு வர முடிவு.

• அரசின் மூலதன செலவுகள் ₹ 7.5 லட்சம் கோடியாக அதிகரிக்கப்படும்.

• பொருளாதார வளர்ச்சிக்கு தனியாரின் பங்கீடு மூலதனமாக உள்ளது.

• பெரு நிறுவனங்களுக்கான கூடுதல் வரி 12-ல் இருந்து 7% ஆக குறைப்பு.

• கூட்டுறவு சங்களுக்கான மாற்றுவரி 15% ஆக குறைப்பு.

• மாநில அரசுகளுக்கு கூடுதலாக ஒரு லட்சம் கோடி ரூபாய் கடன் வழங்கப்படும்.

• எண்ணெய் வித்துகள், சிறு தானியங்கள் உற்பத்திக்கு முக்கியத்துவம். ரூ.44,000 கோடியில் நீர்ப்பாசன திட்டங்க நிறைவேற்றப்படும்.

• கோதாவரி-பெண்ணாறு-காவிரி உட்பட 5 நதி இணைப்பு திட்ட அறிக்கை இறுதி செய்யப்பட்டுள்ளது.

• தனிநபர் வருமான வரி உச்சவரம்பில் எந்த மாற்றமும் இல்லை; அது குறித்தான அறிவிப்பு பட்ஜெட்டில் இடம்பெறவில்லை.