2 பிரிவுகளில் தொடங்கிய சென்னை கிராண்ட் மாஸ்டர்ஸ் செஸ் சாம்பியன்ஷிப் போட்டி: வென்றால் லட்சக்கணக்கில் பரிசு

தமிழ்நாட்டின் விளையாட்டுத்துறை அமைச்சராக உதயநிதி ஸ்டாலின் பொறுப்பேற்ற பிறகு, விளையாட்டுத்துறையில் பல முன்னேற்றம் ஏற்பட்டுள்ளது. தமிழ்நாட்டை உலகமே உற்று நோக்கும் வகையில் தற்போது விளங்கி வருகிறது. கடந்த சில ஆண்டுகளுக்கு முன்னர் நடைபெற்ற செஸ் ஒலிம்பியாட்டில் இருந்து பல முன்னேற்றம் ஒவ்வொரு முறையும் அதிகரித்து வருகிறது.

அந்த வகையில் தமிழ்நாடு விளையாட்டு மேம்பாட்டு ஆணையம் சார்பில் சென்னை கிராண்ட் மாஸ்டர்ஸ் செஸ் சாம்பியன்ஷிப்-2024 போட்டி நடைபெறுவதாக அறிவிக்கப்பட்டது. அதன்படி இன்று (நவ.5) தொடங்கி வரும் 11-ம் தேதி வரை இந்த போட்டி நடைபெறுகிறது. இதனை நேற்று (நவ.04) இளைஞர் நலன் மற்றும் விளையாட்டு மேம்பாட்டுத் துறை கூடுதல் தலைமைச் செயலாளர் முனைவர் அதுல்ய மிஸ்ரா இ.ஆ.ப., அவர்கள் இன்று (04.11.2024) தொடங்கி வைத்தார்.

இப்போட்டியின் மாஸ்டர்ஸ் பிரிவில் இந்தியாவை சேர்ந்த அர்ஜுன் எரிகைசி, தமிழ்நாட்டை சேர்ந்த அரவிந்த் சிதம்பரம், அமெரிக்காவை சேர்ந்த லெவோன் ஆரோனின் உள்பட 8 சர்வதேச மற்றும் இந்திய வீரர்களும், சேலஞ்சர்ஸ் பிரிவில் தமிழ்நாட்டை சேர்ந்த கார்த்திகேயன் முரளி, வி. பிரணவ், எம். பிரனேஷ் மற்றும் ஆர். வைஷாலி போன்ற 8 இந்திய கிராண்ட்மாஸ்டர்கள் விளையாடவுள்ளார்கள்.

மாஸ்டர்ஸ் பிரிவு போட்டியில் வெற்றிபெறுவோருக்கு ரூ.15 லட்சம், சேலஞ்சர்ஸ் பிரிவு போட்டியில் வெற்றிபெறுவோருக்கு ரூ. 6 லட்சம் பரிசு தொகையாக வழங்கப்படும். இப்போட்டியின் மொத்த பரிசு தொகையான ரூ.70 லட்சம் தமிழ்நாடு அரசால் வழங்கப்படவுள்ளது.

இந்த சூழலில் சென்னை கிராண்ட் மாஸ்டர்ஸ் செஸ் போட்டிகளின் முதல் சுற்று இன்று (நவ.5) தொடங்கியது. சென்னை கோட்டூர்புரத்தில் உள்ள அண்ணா நூற்றாண்டு நூலகத்தில் 2-வது சென்னை கிராண்ட் மாஸ்டர் செஸ் போட்டிகள் தொடங்கி நடைபெற்று வருகிறது. இந்த முறை மாஸ்டர்ஸ் மற்றும் சேலஞ்சர்ஸ் என இரண்டு வகையான போட்டிகள் நடைபெற்று வருகிறது. மாஸ்டர்ஸ் பிரிவில் சர்வதேச அளவில் ரேட்டிங் பெற்ற 8 வீரர்களும், சேலஞ்சர்ஸ் பிரிவில் இந்திய வீரர்கள் 8 பேரும் கலந்து கொள்ள உள்ளனர். ஒவ்வொரு வீரரும்,7 வீரர்களுடன் போட்டியிடுவர்.

இந்த போட்டியினை நேரடியாக காண குறிப்பிட்ட அளவிலான இருக்கைகள் பதிவு செய்யப்பட்ட செஸ் அகாடமி மாணவ-மாணவியருக்கு இலவசமாக பார்க்கும் வகையில் ஒதுக்கப்பட்டுள்ளது. மேலும் பொதுமக்கள் பார்வையிட நாள் ஒன்றுக்கு ரூ.100 கட்டணம் நிர்ணயிக்கப்பட்டு, அனுமதி டிக்கெட்டை BookMyShow இணையத்தளத்தின் மூலமாக (https://in.bookmyshow.com/sports/chennai-grand-masters-2024/ET00418069) பதிவு செய்துகொள்ளலாம்.

சென்னை செஸ் கிராண்ட் மாஸ்டர்ஸ் போட்டியை தங்களுக்கு விருப்பமான தேதிகளில் இலவசமாக காண செஸ் அகாடமிகள் anshika@mgd.one & cc srinath@mgd.one என்ற மின்னஞ்சல் முகவரியை தொடர்பு கொள்ளலாம்.