"நீதிக்கட்சியின் கொள்கைகளை எந்நாளும் காப்போம்” - மு.க.ஸ்டாலின் ட்வீட்!

ஆயிரமாயிரம் ஆண்டுகளாக நிலவி வந்த சாதிய ஒடுக்குமுறைகளை ஒரு நூற்றாண்டு காலத்தில் புரட்டிப் போட்டு, சமூக நீதியை நிலைநாட்டிய திராவிட இயக்கத்தின் முதல் அரசியல் அமைப்பான நீதிக்கட்சி தொடங்கப்பட்ட நாள் இன்று.

இடஒதுக்கீடு, அதன் வாயிலாக கல்வி மற்றும் வேலைவாய்ப்புகளில் உரிமை, ஒடுக்கப்பட்ட-தாழ்த்தப்பட்ட மக்களின் நலன் காக்கும் உயர்வான சட்டங்கள், பெண்களுக்கு வாக்குரிமை, மருத்துவக் கல்வி பயில சமஸ்கிருதம் கட்டாயம் என்ற தடையை அகற்றி எல்லோருக்கும் டாக்டர் ஆவதற்கான வாய்ப்பளிப்பு என அனைத்தையும் சமூக நீதிக் கண்ணோட்டத்தில் செயல்படுத்தியது நீதிக்கட்சி அரசு.

ஆங்கிலேயர் ஆட்சியில் மிகக்குறைந்த அதிகாரங்கள் மட்டுமே கொண்ட இரட்டை ஆட்சி முறையில், சமூக சீர்திருத்தத்திற்கான இத்தனை சாதனைகளையும் நிறைவேற்றியது நீதிக்கட்சி எனும் திராவிட அரசியல் இயக்கம். அதன் தொடர்சியாகத்தான் திராவிட இயக்கத்தின் முப்பெரும் தலைவர்களான தந்தை பெரியார் - பேரறிஞர் அண்ணா - தலைவர் கலைஞர் ஆகியோர் சமூக நீதிக் கொள்கையால் சமுதாய மறுமலர்ச்சியை ஏற்படுத்தினர்.

இந்தியாவில் வேறெங்கும் ஏற்படாத சமுதாய மறுமலர்ச்சி தமிழ்நாட்டில் திராவிட இயக்கத்தினால் ஏற்பட்டது. இத்தகு பெருமைகள் வாய்ந்த நீதிக்கட்சியின் 103வது பிறந்தநாள் இன்று.

இதையொட்டி, நீதிக்கட்சியின் வழிவந்த திராவிட முன்னேற்றக் கழகத்தின் தற்போதைய தலைவர் மு.க.ஸ்டாலின், நீதிக்கட்சியை நினைவுகூர்ந்து ட்விட்டரில் பகிர்ந்துள்ளார்.

அவர் வெளியிட்டுள்ள ட்விட்டர் பதிவில், “வகுப்புவாரி பிரதிநிதித்துவம், சமூகநீதி, கல்வி வளர்ச்சியை தமிழர்களுக்கு கொடுத்த நீதிக்கட்சியின் 103வது பிறந்தநாள் இன்று!

தி.மு.க என்பது நீதிக்கட்சியின் நீட்சியே என்றார் பேரறிஞர் அண்ணா! அந்த இயக்கத்தின் கொள்கைகளை எந்நாளும் காப்போம்; நீதிக்கட்சித் தலைவர்களை வணங்குவோம்!” எனக் குறிப்பிட்டுள்ளார்.