“உதயநிதியின் அரசியல் பயணத்தை தீர்மானிக்கப்போவது மக்கள்தான்” - DTNext பேட்டியில் மு.க.ஸ்டாலின் பதில்!

‘டி.டி நெக்ஸ்ட்’ ஆங்கில நாளிதழுக்கு, அதன் செய்தியாளர் ஆ.கார்த்திகேயனுக்கு தி.மு.க தலைவர் மு.க.ஸ்டாலின் அளித்த சிறப்புப் பேட்டியில், உதயநிதி ஸ்டாலினின் அரசியல் பயணம் அவரது செயல்திறனை அடிப்படையாகக் கொண்டு மட்டுமே முடிவு செய்யப்படும் என்றும், அதனை தமிழக மக்கள்தான் முடிவு செய்வார்கள், நான் அல்ல என்றும் தெரிவித்தார். தி.மு.க தலைவர் மு.க.ஸ்டாலின் அளித்துள்ள அப்பேட்டி விவரம் வருமாறு:

கேள்வி: முதல்வர் மற்றும் பிற அ.தி.மு.க அமைச்சர்களின் ஊழலுக்கு எதிராக தி.மு.க இரண்டு முறை ஆளுநரிடம் மனு அளித்தது. ஆனால் உங்கள் மனு மீது ஆளுநர் நடவடிக்கை எடுக்கவில்லை. உங்கள் மனுவின் மீது நடவடிக்கை மேற்கொள்ளப்படும் என்று நினைக்கிறீர்களா?

தி.மு.க தலைவர் மு.க.ஸ்டாலின்: அ.தி.மு.க.வின் ஆட்சியைப் பற்றி விவரிக்க ஒரே ஒரு பொருத்தமான சொற்றொடர் உள்ளது - “கமிஷன், கலெக்சன், கரப்ஷன்”. சிறியது முதல் பெரிய திட்டங்கள் வரை அனைத்திலும் பொதுமக்களின் பணத்தைக் கொள்ளையடிக்கும் நோக்கில் அத்திட்டங்கள் வடிவமைக்கப்பட்டு செயல்படுத்தப்படுகின்றன. அ.தி.மு.க அமைச்சர்களின் ஊழலை வெளிச்சம் போட்டுக்காட்டும் ஆதாரங்களுடன், போதுமான ஆவணங்களுடன் 97 பக்கக் குற்றச்சாட்டுகளை தி.மு.க சமர்ப்பித்துள்ளது. ஆளுநர் அதனை உள்துறை அமைச்சகத்திற்கு அனுப்பி வைத்துள்ளார். நாங்கள் நடத்திய பல்வேறு கூட்டங்களில், மக்கள் தங்கள் அனுபவங்களை முன்வைத்துள்ளனர். இந்தத் தேர்தலில், ஊழல்வாதிகளைத் தண்டிப்பதன் மூலமும், அ.தி.மு.க மற்றும் அவர்களது கூட்டணி வேட்பாளர்களுக்கு கடுமையான தோல்வியைத் தருவதன் மூலமும், இதை ஒரு முடிவுக்குக் கொண்டு வருவதை மக்கள் உறுதி செய்வார்கள்.

கேள்வி: எம்.டெக். சேர்க்கையில் மத்திய அரசின் 49.5 சதவிகித இட ஒதுக்கீடு கொள்கையை பின்பற்றுமாறு அண்ணா பல்கலைக்கழகத்திற்கு சென்னை உயர்நீதிமன்றம் உத்தரவிட்டுள்ளது. 2024 வரை பா.ஜ.க ஆட்சியில் இருக்கப்போகிறது. தமிழகம் பின்பற்றும் 69 சதவிகித இட ஒதுக்கீட்டைப் பாதுகாக்க உங்கள் திட்டங்கள் என்ன?

தி.மு.க தலைவர் மு.க.ஸ்டாலின்: வரலாற்று ரீதியாக, தி.மு.க. கூட்டாட்சி உரிமைகளைப் பாதுகாக்கப் போராடி வருகிறது. மேலும் மாநில சுயாட்சியை அழிக்கவும், மாநிலத்தின் உரிமைகளைக் குறைக்கவும் விரும்புவோருடன் உறவு வைத்திருக்கும் அ.தி.மு.கவைப் போலல்லாமல், மாநிலநலனுக்காக எப்போதும் உறுதியுடன் நிற்கிறது. மத்தியில் பா.ஜ.க.வுடன் கூட்டணியாக நின்றதன் மூலம், அ.தி.மு.க. என்ன சாதித்தது? மதுரையில் எய்ம்ஸ் கட்டுமானம் இரண்டு ஆண்டுகளாக நிறுத்தப்பட்டுள்ளது. ஜி.எஸ்.டி திணிப்பு கோடிக்கணக்கான மக்களின் வாழ்வாதாரங்களைப் பாதித்துள்ளது. அதன் மூலம் தமிழகத்திற்கு வரவேண்டிய உரிய பங்கு நிதிகூட வழங்கப்படவில்லை. நீட் தேர்வை கொண்டுவந்து அனைத்துவித தீமைகளுக்கும் வழிவகுத்தது. இந்தி / சமஸ்கிருத திணிப்புக்கான கருவியாகவும், மாநில சுயாட்சி மீதான நேரடித் தாக்குதலாகவும் இருக்கும் புதிய கல்விக் கொள்கையை அவர்கள் எதிர்க்கவில்லை.

நாடு முழுவதும் விவசாயிகள் கண்டிக்கும் புதிய வேளாண்மைச் சட்டங்களை, அவர்கள் ஆதரிக்கின்றனர். அ.தி.மு.க.வைப் போலன்றி, தி.மு.க மத்திய அரசுக்கு அடிபணியாது. அடிபணியவைக்கும் ஒவ்வொரு முயற்சியையும் நாங்கள் எதிர்ப்போம், எங்கள் இடஒதுக்கீடு கொள்கையை எந்த விலை கொடுத்தாகிலும் பாதுகாப்போம். மாநில உரிமைகளை பாதிக்கும் நோக்கில் எந்தவொரு சவாலையும் எதிர்கொள்ள தி.மு.க எப்போதும் தயாராக உள்ளது. நட்பிற்கு நாங்கள் எப்போதும் கரம் கொடுப்போம், எங்கள் உரிமைகளுக்காக குரல் எழுப்ப நாங்கள் என்றும் தயங்க மாட்டோம். வலதுசாரி சக்திகளுக்கு எதிரான குற்றச்சாட்டுக்கு தலைமை தாங்கும் கட்சிகளில் ஒன்றாக தி.மு.க காணப்பட்டது.

கேள்வி: தேர்தலுக்குப் பின்னர் வலதுசாரி சக்திகளை தி.மு.க தொடர்ந்து எதிர்க்குமா?

தி.மு.க தலைவர் மு.க.ஸ்டாலின்: நிச்சயமாக! அதில் எந்த சந்தேகமும் இல்லை. தி.மு.க எப்போதும் சமூக நீதிக்காக நிற்கும். மாநிலத்தில் சமத்துவமின்மை, மத பிளவுகள் அல்லது எந்தவிதமான அடக்குமுறையின் விதைகளை விதைக்க முயற்சிக்கும் எவரும் கடுமையாக எதிர்க்கப்படுவார்கள். இத்தகைய பிற்போக்கு கூறுகளுக்கு நம் மாநிலத்தில் இடமில்லை. எந்த அடிப்படைவாத சக்தியும் வளரச் செய்யப்படாது. பெரியார், அண்ணா மற்றும் கலைஞர் காலத்திலிருந்தே, சர்வாதிகார மற்றும் மேலாதிக்க போக்குகளுக்கு எதிரான எதிர்ப்பில் தி.மு.க உறுதியுடன் இருந்து வருகிறது.

கேள்வி: தி.மு.க.வுக்கு எதிரான குற்றச்சாட்டுகளை கூறுவதன் மூலம் தி.மு.க கூறும் ஊழல் குற்றச்சாட்டுகளை அ.தி.மு.க தலைவர்கள் எதிர்கொண்டு வருகின்றனர். முதல்வர் உங்கள் மகன் உதயநிதியைப் பற்றிக் கூறுவது ஒரு எடுத்துக்காட்டு.

தி.மு.க தலைவர் மு.க.ஸ்டாலின்: வாரிசு அரசியல் பற்றி என்னிடம் கேள்வி கேட்க அவர்கள் தகுதியுள்ளவர்களா? மக்களவையில் உள்ள ஒரே அ.தி.மு.க உறுப்பினர் யார்? அது பன்னீர்செல்வத்தின் மகன் ரவீந்திரநாத். பன்னீர்செல்வத்தின் மற்றொரு மகன் ஜெயப்பிரதீப், அமித்ஷாவின் மகன் பற்றி என்ன? அவர் பி.சி.சி.ஐ செயலாளராக உள்ளார். வேறு பல எடுத்துக்காட்டுகளும் உள்ளன. அ.தி.மு.க மற்றும் பா.ஜ.க என்ன செய்வது என்பது வாரிசு அரசியல் மற்றும் ஊழலை மோசமானவழிகளில் பின்பற்றுவதாகும். தங்களை சட்டத்திற்கு மேலே கருதும் தங்கள் குடும்ப உறுப்பினர்களுக்கு முக்கிய டெண்டர்களை வழங்குவதன் மூலம் அவர்கள் அரசாங்கத்தின் பணத்தை கொள்ளையடிக்கிறார்கள்.

கேள்வி: உதயநிதி மாநிலம் முழுதும் சூறாவளி சுற்றுப்பயணம் மேற்கொண்டு வருகிறார். அவரது வயதில் (43) நீங்கள் ஏற்கனவே எம்.எல்.ஏ.வாக இருந்தவர், இந்தமுறை அவருக்கு எம்.எல்.ஏ சீட் கொடுக்க நினைக்கிறீர்களா?

தி.மு.க தலைவர் மு.க.ஸ்டாலின்: தி.மு.க கொள்கைப்பிடிப்புடன் மற்றும் அர்ப்பணிப்புடன் செய்யப்படும் கடினமான மற்றும் நேர்மையான உழைப்பினை மதிக்கிறது. இன்று நான் இருக்கும் இடத்திற்கு வருவதற்கு சுமார் 50 ஆண்டுகள் பணியாற்றினேன். உதயநிதியும் மற்றவர்களைப் போலவே கடுமையான உழைப்பை கொடுக்க வேண்டியதிருக்கும். அவரது உழைப்பு மற்றும் தமிழக மக்கள் அவரைப் பற்றி என்ன நினைக்கிறார்கள் என்பதன் அடிப்படையில் அவரது முன்னேற்றப் பயணம் முடிவு செய்யப்படும்.

கேள்வி: “உங்கள் தொகுதியில் ஸ்டாலின்’ என்ற புதிய திட்டத்தை நீங்கள் தொடங்கியுள்ளீர்கள், ஆயிரக்கணக்கான மனுக்களை சேகரித்து 100 நாட்களில் தீர்வு காணப்படும் என்று உறுதியளித்தீர்கள். உங்கள் அனுபவம் எப்படி இருந்தது?

தி.மு.க தலைவர் மு.க.ஸ்டாலின்: நாங்கள் மக்களோடு தொடர்புகொண்டபோது, தமிழ்நாட்டிலுள்ள ஒவ்வொரு தனிநபரும் பிரச்சனைகளோடு போராடுவதைக் கண்டோம். அவர்கள் பிரச்சனையை தீர்ப்பதில் அ.தி.மு.க அரசு தோல்வியுற்றதால் மக்கள் எங்களிடம் உதவி கேட்கிறார்கள். ஆளும் அ.தி.மு.க அரசின் மீது நம்பிக்கை வைப்பதைவிட மக்கள் எங்கள் மீது அதிக நம்பிக்கை வைத்துள்ளார்கள். கடந்த ஒரு மாதத்தில் மாநிலம் முழுவதும் கிட்டத்தட்ட அனைத்து சட்டமன்றத் தொகுதிகளையும் சென்று மக்களை சந்தித்துவிட்டேன். மக்களை நேரடியாக சந்தித்து அவர்களின் பிரச்சனையை போக்குவதில் நேரடியாக ஈடுபடுவது மகிழ்வைத் தருகிறது.” எனத் தெரிவித்துள்ளார்.

இப்பேட்டியின் இரண்டாவது பகுதி இங்கே... “பா.ஜ.க போன்ற எந்தவொரு அதிகாரத்திற்கும் தலைவணங்கவோ வளைந்துகொடுக்கவோ மாட்டோம்” : மு.க.ஸ்டாலின் பேட்டி!