நடிகர் அஜித் குமாரின் கார் பந்தய பயணம்! : துணை முதலமைச்சர் உதயநிதி ஸ்டாலின் வாழ்த்து!

இந்தியத் திரையுலகின் பிரபல நடிகரான அஜித் குமார், திரைத்துறையை கடந்து பலதரப்பட்ட துறைகளில் சிறப்பு வாய்ந்தவராக திகழ்கிறார்.

அவ்வகையில், தற்போது உலக அளவில் சிறப்பு மிக்க கார் பந்தயங்களில் தமிழ்நாட்டின் பெயரை ஒலிக்க வைக்கும் முயற்சியில் ஈடுபட்டு வருகிறார் நடிகர் அஜித் குமார்.

இது குறித்து, துணை முதலமைச்சர் உதயநிதி ஸ்டாலின், “உலக அளவில் சிறப்புக்குரிய 24H Dubai 2025 & The European 24H Series Championship - Porsche 992 GT3 Cup Class கார் பந்தயத்தில் பங்கேற்கவுள்ள நடிகரும், நண்பருமான திரு.அஜித்குமார் சார் அவர்களுக்கு எங்களுடைய மனமார்ந்த வாழ்த்துகளைத் தெரிவித்துக் கொள்கிறோம்.

நம்முடைய தமிழ்நாடு அரசின் விளையாட்டு மேம்பாட்டுத்துறை SDAT Logo-வை ‘அஜித்குமார் ரேசிங்’ யூனிட்டின், கார், ஹெல்மெட் மற்றும் பந்தயம் தொடர்பான உபகரணங்களில் காட்சிப்படுத்தப்பட்டுள்ளதை அறிந்து மட்டற்ற மகிழ்ச்சி அடைந்தோம்.

இதன்மூலம், தமிழ்நாடு விளையாட்டு மேம்பாட்டுத்துறையை உலக அரங்கில் பெருமைப்படுத்தி, ஊக்குவித்துள்ள அஜித் சாருக்கு தமிழ்நாடு அரசின் சார்பாக எங்களது நன்றியைத் தெரிவித்துக்கொள்கிறோம்.

மேலும், முதலமைச்சர் மு.க.ஸ்டாலின் அவர்கள் தலைமையிலான நமது #திராவிட_மாடல் அரசு செயல்படுத்தி வரும் பல்வேறு மக்கள் நலத்திட்டங்கள் - Formula4 Chennai Racing Street Circuit போன்ற முன்னெடுப்புகளை வாழ்த்திய அஜித் சாருக்கு எங்கள் அன்பும், நன்றியும்.

விளையாட்டுத்துறையில் தமிழ்நாட்டை உலக அரங்கில் உயர்த்திட ஒன்றிணைந்து செயல்படுவோம். கார்பந்தய போட்டியில் வென்று தமிழ்நாட்டுக்கு நீங்கள் பெருமை சேர்த்திட வாழ்த்துகள் அஜித் சார்” என தனது X சமூக வலைதளத்தில் பதிவிட்டுள்ளார்.