தோனியிடமிருந்து அனைவரும் கற்றுக்கொள்ள வேண்டும் - புகழாரம் சூட்டிய முன்னாள் கேப்டன் கங்குலி !

இந்திய கிரிக்கெட் அணியில் சச்சின், கங்குலி-க்கு பிறகு அடுத்து நட்சத்திர வீரராக யார் வருவார்கள் என்ற கேள்வி எழுந்தபோது தனது அமைதியாலும், அதிரடி ஆட்டத்தாலும் அந்த கேள்விகளுக்கு பதில் கொடுத்தவர்தான் எம்.எஸ்.தோனி. இந்திய அணியில் இப்படி ஒரு வீரரா என பலரும் வியந்து பார்க்கும் அளவுக்கு தனது அதிரடி ஆட்டத்தை வெளிப்படுத்திய இவர், சச்சின் அவுட் ஆனால், இந்திய அணி தோற்றுவிடும் என கருதப்பட்ட நிலையையம் மாற்றிக்காட்டினார்.

அதனால் எம்.எஸ்.தோனி களத்திலிருந்தால் அது எவ்வளவு பெரிய ரன்னாக இருந்தாலும் அடித்து இந்திய அணிக்கு வெற்றியைத் தேடி கொடுத்துவிடுவார் என்ற நம்பிக்கையைப் இந்திய ரசிகர்களுக்கு விதைத்தார். அதன்பின்னர் இந்திய அணிக்கு கேப்டனாகி முதல் டி20 உலகக்கோப்பை தொடரிலேயே இந்திய அணிக்கு கோப்பையை வென்று கொடுத்தார்.

இவர் கேப்டனாக இருந்து மூன்று விதமான உலகக் கோப்பை வென்று இந்திய அணியின் கிரிக்கெட் வரலாற்றில் சரித்த சாதனையைப் படைத்தது. மேலும், மைதானத்தில் எந்தவித ஆக்ரோஷத்தையும் காட்டாமல் களத்தில் தனது பேட்டால் பதிலடி கொடுப்பார். இதனாலேயே இவரை இந்திய ரசிகர்களைத் தாண்டி உலகம் முழுவதும் ரசிகர்களை சம்பாதித்தார்.

அனைத்து விதமான சர்வதேச கிரிக்கெட் போட்டியிலிருந்தும் ஓய்வு பெற்ற தோனி தற்போது ஐ.பி.எல் தொடரில் மட்டும் சென்னை அணியை வழிநடத்தி வருகிறார். பெரும்பாலும் இந்த தொடர்தான் அவரின் இறுதி ஐபிஎல் தொடராக இருக்கும் என கருதப்படுவதால் சென்னை அணி விளையாடும் இடங்களில் எல்லாம் தோனிக்கு ஆதரவாக ரசிகர்கள் குவிந்து வருகின்றனர்.

இந்த தொடரில் தோனி தலைமையிலான சென்னை அணி ஐபிஎல் தொடரின் இறுதிப்போட்டிக்கு முன்னேறியுள்ளது. இதனால் இந்த முறை சென்னை அணி கோப்பையை வெல்லும் என ரசிகர்கள் ஆவலோடு எதிர்பார்த்தவண்ணம் உள்ளனர். இந்த நிலையில், முன்னாள் இந்திய அணி கேப்டன் கங்குலி பெரிய போட்டிகளை எப்படி வெல்ல வேண்டும் என்று மற்றவர்களுக்கு தோனி காட்டியுள்ளார் என புகழாரம் சூட்டியுள்ளார்.

இது தொடர்பாக பேசிய அவர், "சென்னை அணி இந்த தொடரில் அற்புதமாக ஆடியது. மகேந்திர சிங் தோனி பெரிய போட்டிகளை எப்படி வெல்ல வேண்டும் என்று அனைவர்க்கும் காட்டியுள்ளார். தோனியில் கேப்டன்ஷிப்பில் தனித்துவமானவர். பெரிய போட்டிகளை எப்படி வெல்ல வேண்டும் என்று அவர் காட்டியுள்ளார். அவரிடமிருந்து அனைவரும் கற்றுக்கொள்ள வேண்டும்" என்று கூறியுள்ளார். .