“ரொம்ப Touching-ஆ இருக்கு.. கண்ணெல்லாம் கலங்கிடுச்சு..” - ‘அமரன்’ படக்குழுவினருக்கு முதலமைச்சர் பாராட்டு!

ராஜ்குமார் பெரியசாமி இயக்கத்தில், சிவகார்த்திகேயன், சாய் பல்லவி உள்ளிட்ட பலரும் நடித்துள்ள திரைப்படம்தான் 'அமரன்'. கமல்ஹாசனின் ராஜ்கமல் பிலிம்ஸ் இன்டர்நேஷனல் மற்றும் சோனி லைவ் இணைந்து தயாரித்துள்ள இந்த திரைப்படத்திற்கு, ஜி.வி.பிரகாஷ் இசையமைத்துள்ளார்.

மறைந்த இராணுவ வீரர் மேஜர் முகுந்த் வரதராஜனின் வாழ்க்கை கதையை மையமாக வைத்து உருவாகியுள்ள இந்த படத்தில், முகுந்த் வரதராஜன் கதாபாத்திரத்தில் சிவகார்த்திகேயனும், முகுந்தின் மனைவி இந்து ரெபேக்கா கதாபாத்திரத்தில் சாய் பல்லவியும் நடித்துள்ளனர். இப்படத்தில் இடம் பெற்றுள்ள “ஹே மின்னலே...” என்ற பாடல் வெளியாகி, 16 மில்லியன் பார்வையாளர்களை கடந்து ஈர்த்துள்ளது.

இந்த படம் இன்று (அக்.31) தீபாவளியை முன்னிட்டு திரையரங்குகளில் வெளியாகியுள்ள நிலையில், ரசிகர்கள் மத்தியில் பெரும் வரவேற்பை பெற்று வருகிறது. உண்மை சம்பவத்தை அடிப்படையாக உருவாகியுள்ள இந்த படம் ரசிகர்கள் மத்தியில் கொண்டாடப்படும் என்று எதிர்பார்க்கப்படுகிறது.

இந்த சூழலில் ‘அமரன்’ திரைப்படத்தை முதல் திரையிடலாக நேற்று இரவு முதலமைச்சர் மு.க.ஸ்டாலினுக்கு பிரத்யேகமாக காண்பிக்கப்பட்டது. இந்த படத்தின் தயாரிப்பாளரான கமல்ஹாசன் அழைப்பை ஏற்று முதலமைச்சர் மு.க.ஸ்டாலின், துணை முதலமைச்சர் உதயநிதி ஸ்டாலின் மற்றும் படக்குழுவினர் இணைந்து படத்தை கண்டனர்.

இதைத்தொடர்ந்து அப்படத்தின் தயாரிப்பாளர் நடிகர் கமல்ஹாசனை தொலைபேசி வாயிலாக தொடர்புகொண்ட முதலமைச்சர், நெகிழ்ந்து பாராட்டு தெரிவித்தார். இதுகுறித்து முதலமைச்சர் போனில் பேசுகையில், “படம் ரொம்ப நல்லா இருக்கு... ரொம்ப பிடிச்சுருக்கு... படத்தோட க்ளைமேக்ஸ் ரொம்ப Touching-ஆ இருக்கு... கண்ணெல்லாம் கலங்கிடுச்சு...” என்று நெகிழ்ந்து பேசினார். இதுகுறித்த வீடியோ இணையத்தில் வைரலாகி வருகிறது.

மேலும் இதுகுறித்து தனது சமூக வலைதள பக்கத்தில், “நண்பர் கலைஞானி கமல்ஹாசன் அவர்களது அன்பு அழைப்பை ஏற்று, நேற்று அமரன் திரைப்படம் பார்த்தேன். புத்தகங்களைப் போல், திரைப்பட வடிவிலும் உண்மைக் கதைகளை இன்றைய இளைஞர்களிடம் கொண்டு சேர்ப்பது மகிழ்ச்சியளிக்கிறது.

தமிழ்நாட்டைச் சேர்ந்த இராணுவ வீரர் மேஜர் முகுந்த் வரதராஜன் அவர்களது வீரத்தையும் அர்ப்பணிப்பையும் உணர்வுப்பூர்வமாகப் படமாக்கியுள்ள இயக்குநர் ராஜ்குமார் பெரியசாமி, மேஜர் முகுந்த் வரதராஜன் - இந்து ரெபேக்கா வர்கீஸ் ஆகியோரது பாத்திரங்களைத் தங்களது நடிப்பால் சிறப்பாக வெளிப்படுத்திய தம்பி சிவகார்த்திகேயன், சாய் பல்லவி மற்றும் அமரன் படக்குழுவினர் அனைவருக்கும் என்னுடைய வாழ்த்துகள்.

நாட்டைப் பாதுகாக்கும் நமது இராணுவ வீரர்களுக்கும், நம் நினைவில் வாழும் மேஜர் முகுந்த் வரதராஜன் அவர்களுக்கும் Big Salute!” என்று குறிப்பிட்டுள்ளார்.